Celebrouse nas pistas de Balaidos (Vigo) este domingo, 5 de xuño, o Campionato Galego Xuvenil-Xúnior e Promesa de Pista ó Aire Libre. Representando ó Club Atletismo Porriño tiñamos a Iria Rodríguez Huertas, participando na proba dos 1.500 ml. Dado o número de particípantes nas diferentes categorías, decidiron facer unha única proba conxunta.

En total, 11 rapazas tomaron a saída. Desde o principio, formouse un grupo de 5 que levarían o ritmo de carreira, entre as que estaban, ademáis de Iria, Eva Cid, Laura Santos, Uxía Pérez e Claudia Blanco. Pasaron o 800 xuntas en 2.32, e o 1000 sobre 3.10. Iria ía un pouco encaixonada, e de feito tiña previsto dar un cambio de ritmo nese momento, pero non foi ata o 300 final cando puido buscar un oco para escaparse cun cambio brutal, que apenas puideron seguir o resto do quinteto, agás Laura Santos, que entrou a un segundo de Iria.

O tempo final, 4.41, non está nada mal, pero aínda ten bastante marxe de mellora. O obxectivo sería poder baixar de 4.37, mínima para participar no Campeonato de Europa.

Crónica e foto: Jose Antonio Rodríguez

O 22 de Maio nas Pistas Universitarias de Elviña disputouse o  Campionato de Galicia de Clubes Benxamin, Alevin e Infantil.

Foi un día intenso, con madrugón incluido, onde os nenos e nenas estiveron enoooormes e os pais e nais o pasamos coma ananos.

Logo da viaxe tranquila no bus, chegamos ó campus co tempo xusto para poñer as zapatillas de cravos e comezar as primeiras probas.

Os nosos pequechos fixeron un papelón incríble. E nós quedamos sen voz de tanto berrar animándoos.

Ainda que do Clube só viaxou Fonso con nós, houbo máis dun entrenador preparando aos participantes. Se axudaron uns os outros e se animaron moito, foi moi emocionte poder comprobalo.

Logo das probas da mañán comemos todos xuntos uns bocatas riquísimos, con froitas sanísimas e pastelitos para repoñer ou coller forzas, que nos levou o club.

E como nos votaron do estadio, fomos a tomar un café en grupo. Os nenos aproveitaron para xogar un partidiño de futbol e o resto logo de un breve paseo, volvemos a estar sentados.

Pola tarde, outra tanda de nervios e berros das familias e chegaron os primeiros postos con Pablo e Isaías.

Todos contentos polos resultados acadados e polo día en grupo, volvemos en bus para a casa, un pouco cansos, pero agardando repetir en breve.

Nin que dicir ten, que o Clube Atletismo Porriño acadou a 1ª praza no tándem afición – atletas.

Crónica: Familia Bautista Estévez

Foto: Familia Bautista Estévez

O pasado domingo 17 de abril tivo lugar na cidade herculina o campionato galego de maratón, e nel participaron numerosos atletas do club (e arredores). Paralelamente, desenvolveuse a proba de 10 km, na que tamén houbo representación da Louriña, grazas a Mónica e Sandra…

A mañá presentábase sorprendentemente despexada (logo dos prognósticos da semana e da chuvia do sábado, que non agoiraban nada bo), sen vento e cunha temperatura ideal para correr. Reunímonos na zona da saída, en torno ao Obelisco e fixemos a foto de rigor para, acto seguido, despois de desexarnos sorte e facer algunha broma, partir á aventura: correr 42 km e 195 m, repartidos en tres voltas, polas rúas da Coruña.

O grupo casi ao completo. Falta Isaías.

A saída foi puntual e transcorreu sen atascos, a pesar de que saïamos na parte de atrás, polo que non tardamos en coller o noso ritmo (eu fixen case toda a carreira con José Ramón, un “ex” do club). Co paso do tempo as rúas comezaron a encherse de xente, agás na zona do porto, e a animación ía a máis, cun público entregado e con grupos musicais polo paseo marítimo. A verdade é que a primeira parte da carreira pasoume voando, charlando con Jose e animando aos compañeiros nas zonas nas que nos cruzabamos: Jesús Martínez, concentrado, pero moi enteiro; Manu e Esteban apiñados coma sardiñas no grupo de 3.30; Irene, sempre sorrinte e espontánea; Nando, co seu paso metódico e regular; Jesús Amieiro, ao final con cara de canso; e Carlos, con ritmo tranquilo pero aguantando.

Pero a medida que pasan os quilómetros o famoso “muro” fai a súa aparición gradual e comezan a pesar as pernas. Así, no km 34 Jose e mais eu separámonos e tirei un pouquiño por diante del, desexando a cada pouco chegar ao avituallamento (había cada 5 km). Na zona do porto vin a Esteban, que se descolgara do grupo de 3.30 e animeino a que me seguise. Así o fixo ata que unha cambra o fixo parar. Axudámolo a estirar Jose (que xa me alcanzara) e mais eu, e reanudamos a marcha, xa cada un como podía ata a meta, na praza de María Pita, onde estaban Mónica e Sandra animando e sacando fotos (moito lles temos que agradecer a súa presenza constante entre o público dende que acabaron o 10.000, aplaudindo e dando ánimos). O avituallamento final non estivo mal, aínda que as bebidas isotónicas estaban frías de máis, o que provocou algún pequeno “susto” coa indisposición dun compañeiro, pero sen consecuencias.

O éxito dos representantes do club foi total. Por que? Pois porque acabamos todos, e ese é un obxectivo moi razoable nunha carreira destas características.

Ademais, por se fose pouco, Irene Sobreira alzouse como campioa galega de maratón na súa categoría (posto 146 na xeral), cun tempo neto de 3:48:51.

O resto dos resultados do campionato galego son os seguintes (os tempos que se citan son netos):

Jesús Martínez foi 126º na xeral e 22º na categoría Vet40 cun tempo de 3:14:12

Manu Fernández foi 310º na clasificación global do maratón (el non corría o campionato) e 55º na categoría Vet45 cun tempo de 3:27:32

Un servidor foi 122º na xeral e 13º na categoría Vet50 cun tempo de 3:35:44

Nacho Louriño foi 441º na xeral global e 97º na categoría Vet40 cun tempo de 3:40:20

Esteban González foi 133º na xeral e 40º na categoría Vet40 cun tempo de 3:41:27

Nando García foi 162º na xeral e 17º na categoría Vet50 cun tempo de 4:04:58

Jesús Amieiro foi 169º na xeral e 36º na categoría Vet35 cun tempo de 4:15:41

Carlos Álvarez , escoltado na última volta polo gran Isaías Burlido, foi 179º na xeral e 50º na categoría Vet40 cun tempo de 4:26:42

Unha mágoa que non puidésemos estar presentes todos os que comezamos coas tiradas longas… Acordámonos moitísimo de Lito, Jose, Daniel e do gran Venancio!.

Carreira de 10 km

Polo que comentaron despois, Mónica e Sandra tiveron diferentes valoracións da carreira: Mónica Pena amosábase satisfeita, obtendo un tempo neto de 00:48:18 (12ª na súa categoría e 587ª na xeral), mentres Sandra Sobreira fixo unha carreira por debaixo das súas posibilidades, obtendo un tempo de 00:49:28 (586ª na xeral e 21ª na súa categoría).

Foto de La Voz de Galicia

Foto de La Voz de Galicia

E, como remate, tivemos a ocasión de contar as nosas “batalliñas” nun xantar en común que fixemos no mesón A Roda. Cansos, pero contentos.

Fotos: Mónica Pena e La Voz de Galicia

Crónica: Paco Conde

Este domingo 10 de Abril celebrouse o 40º cross Coutada-Beade no que participaron 9 dos nosos rapaces.

A maña estaba moi desapacible con moita choiva e vento. Pero xunto a hora das carreiras saiu o sol e non choveu nadiña.

A maña rematou coa entrega de trofeos, un sorteo de premios e voltando a chover con moita forza.

Na clasificación houbo de todo Isaías Gil e Noa Burgos remataron 1º; Pablo Almeida e Laura  González 2º; Sabela Guisande 3ª; Uxia Bautista e Anxo Gil 4º; Daniel Philippon 8º e por último Xacobe Porto 10º, todos nas súas respectivas categorías.

Crónica: Marga Argibay

Foto: Marga Argibay